İyunun 11-də Müsavat Partiyasının iki Məclis və bir sıravi üzvü Biləsuvar rayon Məhkəməsinin qərarı ilə həbs edilib. Onlardan Müsavat Partiyasının Məclis üzvləri Ələddin Ələsgərli 2 il 3 ay, Qoşqar Nuralı 2 il, partiya fəali Cabir Vəliyev isə 2 il 3 ay azadlıqdan məhrum olunub. Həmin şəxslər Cinayət Məcəlləsinin 221.2.1 (bir qrup şəxs tərəfindən törədilən xuliqanlıq) maddəsinə əsasən həbs ediliblər.

Partiyadan verilən məlumata görə, cinayət işinin qaldırılmasının səbəbi rayon təşkilatının ötən il dekabrın 31-də ictimai iaşə obyektlərindən birində Dünya Azərbaycanlarının Həmrəylik Günü və Yeni il ilə bağlı bayram tədbiri keçirməsindən sonra baş verən insidentdir. İddiaya görə, yerli hakimiyyət orqanlarının sifarişi ilə həmin gün partiya fəallarına qarşı təxribat təşkil edilib. Partiyadan habelə vurğulandığına görə, təxribat zamanı Ə.Ələsgərliyə xəsarət yetirildiyi rəsmi tibbi ekspertizada təsdiq edilsə də, məhkəmə qarşı tərəfi cərimələməklə kifayətlənib, müsavatçılar barəsində isə "heç bir əsas olmadan azadlıqdan məhrum olunmaları barədə sifarişli hökm çıxarıb".

Müsavat Partiyası bu hökmü Azərbaycanda repressiyaların davamı kimi qiymətləndirir.

Hələlik, Müsavat Partiyasının bəyanatına Biləsuvar rayon Məhkəməsi, yerli hakimiyyət orqanları və başqa maraqlı tərəflərdən münasibət almaq mümkün olmayıb.

Xatırlatma

Bir sıra yerli hüquq müdafiəçilərinin hazırladığı siyahıya görə Azərbaycanda 370-dən çox siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Rəsmilər hesab edirlər ki, siyasi məhbus siyahılarında yer alan şəxslər sırf törətdikləri əmələ görə məsuliyyətə cəlb olunublar.

Özbəkistanın Moskvadakı səfirliyi Rusiya Xarici İşlər Nazirliyinə (XİN) nota göndərərək OMON-un Moskvada miqrantlar üçün yataqxanaya basqınına münasibət bildirməyi, Rusiya güc strukturlarının Özbəkistan vətəndaşlarına qarşı hərəkətlərinə hüquqi qiymət verməyi xahiş edib.

Bu barədə özünün Telegram-kanalında XİN-in mətbuat katibi Axror Burxanov məlumat verib. Onun sözlərinə görə, Moskvadakı insident Özbəkistan XİN-in rusiyalı həmkarları ilə iyunun 10-da baş tutan aylıq görüşündə müzakirə edilib. Özbəkistan XİN-in nümayəndələri Rusiya ərazisində qanunsuz axtarışlar və respublika vətəndaşları ilə kobud rəftar hallarından narahat olduqlarını bildiriblər.

"Biz belə halların ölkələrimiz arasında dostluq münasibətlərinə qətiyyən uyğun gəlmədiyinə və onların qarşısının alınması üçün konkret tədbirlərə ehtiyac olduğuna diqqət çəkdik", - XİN-in mətbuat xidmətinin məlumatında deyilir.

İyunun 8-də hüquq-mühafizə orqanları Moskvada miqrantlar üçün yataqxanada sərt reyd keçirib. Miqrasiya rejimini pozduğu iddia olunan bir neçə nəfərın saxlandığı bildirilir. Onların arasında sonradan ölkədən deportasiya edilən iki Tacikistan vətəndaşı da var. Reydin videosu sosial şəbəkələrdə geniş yayılıb.

Rusiya paytaxtında miqrant yataqxanasında baş verən insidentə Özbəkistanın ictimai xadimləri münasibət bildirib. Jurnalistika və Kütləvi Kommunikasiyalar Universitetinin rektoru Şerxodxon Kudratxoca Moskva OMON-unun hərəkətlərini "adi nasizm" adlandıraraq Özbəkistan vətəndaşlarını Rusiyaya əmək miqrasiyasından imtina etməyə və bunun üçün başqa ölkələri seçməyə çağırıb.

Bundan əvvəl Qırğızıstan vətəndaşlarının tez-tez gəldiyi Moskva hamamına polis basqını ilə əlaqədar bu Mərkəzi Asiya ölkəsinin Xarici İşlər Nazirliyi də etiraz notası verib.

Rusiya XİN Özbəkistan səfirliyindən notanın alındığını təsdiqləyərək daxil olan məlumatın "diqqətlə" araşdırıldığını vurğulayıb. XİN-dən bildirilib ki, Rusiya ilə Özbəkistan arasında münasibətlər "müttəfiqlik və strateji xarakter daşıyır, ikitərəfli gündəmdəki bütün məsələlər bu yanaşma ilə həll olunur".

"Azərbaycan Siyasi Məhbuslarına Azadlıq" Birliyi ölkədə siyasi məhbus sayılan şəxslərin yeni siyahısını açıqlayıb. Siyahıya 375 nəfərin adı daxil edilib.

Bu rəqəm birliyin 2025-ci il fevralın 12-də təqdim etdiyi siyahı ilə müqayisədə 18 nəfər çoxdur.

Yeni siyahıya jurnalist Ülviyyə Əli, ictimai fəal Əhməd Məmmədli, vətəndaş cəmiyyətinin üzvləri Bəşir Süleymanlı, Məmməd Alpay, dini baxışlı insanlar, müxalifətçilər və digərləri əlavə edilib.

Hesabatda siyasi məhbus sayılanlar 12 kateqoriya üzrə bölünüb. Sənəddə onların 29-u jurnalist və bloqer, 6-sı hüquq müdafiəçisi, 39-u ictimai-siyasi fəal, 5-i milli azlıqların nümayəndəsi, 2-si müharibə əleyhdarı, 5-i deportasiya olunmuş siyasi mühacir, 241-i dini kəsimdən olan insanlar, 12-si isə ömürlük məhkum kimi təqdim edilirlər.

Bundan əlavə, müxtəlif işlər üzrə 36 nəfər də siyasi məhbus hesab edilib.

Amma Azərbaycanda siyasi məhbus sayılan şəxslərlə bağlı vahid siyahı yoxdur. Başqa təşkilatların hazırladığı siyahılarda isə, əsasən, daha az məhbus yer alır.

Beynəlxalq hüquq müdafiə təşkilatları Azərbaycanda siyasi məhbusların azad olunmasına çağırışlar edir.

Rəsmi Bakı isə, bir qayda olaraq, ölkədə siyasi məhbusların olmadığını bildirir, yerli və beynəlxalq təşkilatların mövqeyini rədd edirlər. Rəsmilərə görə, Azərbaycanda siyasi məhbus siyahılarına daxil edilən şəxslər sırf törətdikləri əmələ görə mühakimə olunublar.

Prezidentin imzaladığı son iki əfv sərəncamına siyasi məhbus hesab edilən bir şəxs belə düşməyib.

Embed paylaş

71-ci əfv sərəncamı: 'Siyasi məhbus' adlandırılanlardan heç kim siyahıda yoxdur

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:03:43 0:00

Azərbaycan Mərkəzi Bankının (AMB) İdarə Heyəti uçot dərəcəsini dəyişməyib.

Bu gün, iyunun 11-də açıqlanan qərarı ilə uçot dərəcəsi 7.25, faiz dəhlizinin aşağı həddi 6.25, yuxarı həddi isə 8.25 faiz səviyyəsində dəyişməz saxlanılıb.

"Qərar faktiki inflyasiyanın proqnoz inflyasiya trayektoriyasına uyğunluğu, proqnozlaşdırılan inflyasiyanın hədəflə (4±2%) müqayisəsi, son qlobal iqtisadi proseslərin mümkün təsirləri, daxili makroiqtisadi vəziyyət, həmçinin pul siyasəti qərarlarının ötürücülüyü nəzərə alınmaqla qəbul edilib", - AMB bəyan edib.

Son bir ildə AMB uçot dərəcəsini sabit saxlayır.

Müstəqil iqtisadçılar isə hesab edirlər ki, Azərbaycanda uçot dərəcəsinin müəyyən edilməsi bir qədər formal xarakter daşıyır. Onlar deyir ki, uçot dərəcələri dəyişəndə belə bu bank faizlərinə təsir etmir. Əslində uçot dərəcəsi aşağı olarsa, kredit faizləri aşağı düşməlidir. Müstəqil ekspertlər vurğulayırlar ki, ölkədə iqtisadi institutlar zəif olduğu üçün Mərkəzi Bankın və onun faiz dərəcəsinin iqtisadiyyatda ciddi rol almasında problemlər var.

Rusiya Dövlət Duması sənədlərin saxlanması, mesajlaşma, dövlət və kommersiya xidmətləri, o cümlədən bank xidmətlərini özündə birləşdirən vahid tətbiqin yaradılmasını nəzərdə tutan qanun layihəsini təsdiqləyib. Sənəd Dövlət Dumasının iyunun 10-da keçirilən iclasında eyni anda baş tutan ikinci və üçüncü oxunuşda qəbul edilib.

Belə bir tətbiqin yaradılması daha əvvəl prezident Putin tərəfindən dəstəklənib.

Xidmət 'Qosusluqi' portalındakı şəxsi kabinetdən və digər dövlət sistemlərindən məlumatların kağız sənədlər olmadan ötürülməsinə imkan verəcək. Onun vasitəsilə şəxsiyyəti təsdiqləmək və sənədləri təsdiqlənmiş elektron imza ilə imzalamaq mümkün olacaq. Təhsil xidmətləri və tədris müəssisələrinin rəsmi çatları bu platformaya inteqrasiya olunacaq.

İyunun əvvəlində Rusiya prezidenti Vladimir Putin hökumət və maliyyə xidmətlərinin vahid messencerdə birləşdirilməsi barədə tapşırıq verib. Qanun layihəsində yeni tətbiqin hansı şirkət tərəfindən hazırlanacağı göstərilməsə də, onun real rəqabət şəraiti olmadan istifadəyə veriləcəyi artıq məlumdur. Profil üzrə ixtisaslaşmış KİV-lərin məlumatına görə, qanun layihəsi VK şirkəti tərəfindən hazırlanmaqda olan "Max" adlı xidmət üçün nəzərdə tutulub.

Tətbiqin hazırlanması barədə martda 'Vedomosti' qəzeti yazmışdı. Şirkət (VK) artıq bir neçə ildir ki, prezident Putinin dostu Yuri Kovalçukun nəzarətində olan şirkətlər qrupuna daxildir. Şirkətə Prezident Administrasiyası rəhbərinin müavini Sergey Kiriyenkonun oğlu və Kovalçukun qardaşı nəvəsi rəhbərlik edir.

"The Bell" yazıb ki, bu, artıq VK şirkətinin messencer istifadəyə verməyə yönəlmiş beşinci cəhdidir. Lakin şirkət indiyədək heç vaxt bu qədər güclü dövlət dəstəyi almayıb.

"The Bell"in digər yazısında bildirilib ki, Rusiyada messencer bazarına hazırda xarici şirkətlər nəzarət edir. Ölkə əhalisinin 97 milyonu hər ay "WhatsApp" tətbiqindən istifadə edir. Onun sahibi olan "Meta" şirkəti Rusiya hakimiyyəti tərəfindən "ekstremist təşkilat" kimi tanınıb. 90 milyon nəfər isə ofisi Dubayda yerləşən "Telegram" istifadəçisidir.

Avropa Komissiyası 18-ci sanksiyalar paketində Rusiya neftinin satış qiyməti üçün həddin daha da endirilməsi (60 dollardan 45 dollara) və daha 22 Rusiya bankının SWIFT-dən çıxarılmasını təklif edib. Bu barədə Avropa Komissiyasının prezidenti Ursula Fon der Lyayen məlumat verib.

Onun sözlərinə görə, Rusiya neftinin satış qiymətinin həddinin aşağı salınması məsələsi hələ G7 sammitində müzakirə ediləcək.

Avropa Komissiyası həmçinin "Şimal Axını"nın fəaliyyətini qadağan etməyi, Rusiyanın "kölgə donanması"nın daha 77 gəmisini sanksiyalar siyahısına salmağı, Rusiyaya yardım edən üçüncü ölkələrə sanksiyaların tətbiqini və Rusiya xammalından istehsal olunan neft məhsullarının ixracını yasaqlamağı təklif edir.

Ursula Fon der Lyayen deyib ki, Rusiyanın məqsədi sülh deyil, ona görə də Avropa Komissiyası Rusiya hökumətinə qarşı təzyiqi artırmaq üçün 18-ci sanksiya paketini qəbul edir.

Avropa İttifaqı 17-ci sanksiya paketini mayın 20-də qəbul edib. Həmin paketə Rusiyanın "kölgə donanması"nın 200-ə yaxın tankeri, sanksiyalardan yayınan 30 şirkət və hərbi sənaye kompleksi ilə əlaqəli 75 fiziki və hüquq şəxs daxil idi.

2022-ci il fevralın 24-də Rusiya Ukraynaya yenidən təcavüzə başlayıb. 11 il əvvəl də Rusiya Ukraynanın bir hissəsini-Krımı tutmuşdu.

2022-ci ildə prezident Vladimir Putin Ukraynanın dörd vilayətinin (Donetsk, Luqansk, Zaporojye və Xerson) Rusiyanın tərkibinə qəbulu haqqında konstitusiya qanununu imzalayıb.

Hazırda Ukrayna ərazisinin 20 faizindən çoxu, o cümlədən Luqansk vilayəti tam, Donetsk, Zaporojye və Xerson vilayətlərinin isə çox hissəsi işğal altındadır.

Qazın topdan və pərakəndə satışı ilə bağlı yenidən tənzimlənmə nəzərdə tutulur.

AZƏRTAC-ın xəbərinə görə, bu, Milli Məclisin Təbii ehtiyatlar, energetika və ekologiya komitəsinin iyunun 10-da keçirilən iclasında müzakirəyə çıxarılan "Qaz təchizatı haqqında" yeni qanun layihəsində öz əksini tapıb.

Qanun layihəsinə əsasən, qazın topdansatışını yalnız lisenziyalaşdırılmış topdan satıcılar həyata keçirəcək. Bu satış forması topdan satıcı ilə pərakəndə satıcı və ya iri istehlakçılar arasında bağlanmış müqavilələrə əsaslanacaq. Pərakəndə satış isə birbaşa pərakəndə satıcılarla istehlakçılar arasında imzalanan müqavilələr vasitəsilə gerçəkləşdiriləcək.

Qaz satıcılarının yalnız qaz təchizatı sahəsində fəaliyyət göstərmələri ilə bağlı müddəa da qanun layihəsində əksini tapıb. Layihədə qeyd olunan istisnalar xaricində qaz satıcılarının bu sektordan kənar fəaliyyətlə məşğul olmalarına yol verilməyəcək. Sözügedən məhdudiyyət 2027-ci il yanvarın 1-dən qüvvəyə minəcək.

Qiyməti müəyyən edən dəyişir

"Qaz təchizatı haqqında" yeni qanun layihəsi Azərbaycanda qazın qiymət tənzimlənməsi mexanizmində əhəmiyyətli dəyişikliklər və sektorun strukturlaşmasında yeniliklər vəd edir.

Xəbərə görə, bunu Energetika Nazirliyinin şöbə müdiri Rahid Əsədov Milli Məclisin komitə iclasında çıxışı zamanı söyləyib.

O bildirib ki, qanunun qəbulu ilə qaz tariflərinin müəyyən edilməsi səlahiyyəti indiki Tarif Şurasından tənzimləyici orqana keçəcək: "Layihədə qaz satıcısının hüquq və vəzifələri dəqiq şəkildə müəyyən edilib. Bundan əlavə, qaz təchizatı zəncirində fəaliyyət göstərən subyektlərin bölünməsi həyata keçiriləcək. Bu, qazın paylanması, satışı, nəqli, topdansatışı və idxalı ilə məşğul olan qurumun daxilində ayrı-ayrı hüquqi şəxslərin yaradılmasını nəzərdə tutur. Bu addımın sektorun daha şəffaf və səmərəli idarə olunmasına töhfə verəcəyi gözlənilir".

Nazirlik rəsmisinin sözlərinə görə, yeni qanun layihəsi qaz sektorunda rəqabətliliyi artırmaq və istehlakçıların maraqlarını daha yaxşı qorumaq məqsədi daşıyır.

Tənqidlər...

Amma yeni qanun layihəsi ilə bağlı sosial şəbəkələrdə tənqidlərə də rast gəlmək mümkündür. Bir sıra ölkə vətəndaşlarının fikrincə, qanunvericiliyə dəyişiklik qiymət artımına yol açacaq. Üstəlik, onların fikrincə, belədə qiymət artımları zamanı hökumət birbaşa tənqidlərdən də yayınmış olacaq.

Tarif Şurasına İqtisadiyyat naziri rəhbərlik edir.

Ötən həftə Qazaxıstan prezidenti Kasım-Jomart Tokayevin qərarı ilə gözlənilmədən müdafiə naziri vəzifəsindən azad edilən Ruslan Jaksılıkov saxlanılıb və Astanada istintaq təcridxanasına salınıb.

Bu barədə Qazaxıstan mətbuatı məlumat yayıb. Onun həbsinin təfərrüatları açıqlanmır.

"Elmedia" öz mənbələrinə istinadən yazır ki, keçmiş müdafiə naziri Dövlət Təhlükəsizliyi Komitəsi tərəfindən saxlanılıb. "Güman edirik ki, bu, yeyinti ilə bağlıdır", - mənbə bildirib.

Jaksılıkov əvvəllər daxili işlər nazirinin müavini və Milli Qvardiyanın komandanı vəzifələrində çalışıb. 2022-ci ilin yanvar hadisələrindən sonra Qazaxıstanın müdafiə naziri təyin edilib. O zaman yanacaq qiymətlərinin yuxarı həddinin ləğvi səbəbindən başlayan kütləvi etirazlar genişmiqyaslı iğtişaşlara çevrilmişdi. İğtişaşların yatırılması üçün Qazaxıstan hökuməti Kollektiv Təhlükəsizlik Müqaviləsi Təşkilatından (KTMT) yardım istəyib.

Jaksılıkovun nazir kimi fəaliyyəti ilə bağlı yazılarda bildirilib ki, son illərdə Qazaxıstanda məcburi hərbi xidmətə çağırış halları kəskin şəkildə artıb.

Jaksılıkovun müdafiə naziri vəzifəsindən azad edilməsinin səbəbi rəsmi olaraq açıqlanmayıb.

Avstriyanın Qrats şəhərində gimnaziyada baş verən atışma nəticəsində azı 10 nəfər həlak olub, 20-dən çox yaralı var.

Bu barədə Avstriya mətbuatı məlumat yayıb. Atəş açan şəxsin gimnaziya şagirdi olduğu iddia edilir. Onun intihar etdiyi bildirilir.

Avstriyanın APA agentliyinin xəbərinə görə, ölənlər arasında həm şagirdlər, həm müəllimlər var. Agentlik 28 yaralıdan bir neçəsinin vəziyyətinin ağır olduğunu yazıb.

Hadisənin səbəbləri ilə bağlı, hələlik, rəsmi məlumat yoxdur.

İsrail 11 aktivistlər birlikdə "Madleen" yaxtası ilə Qəzza zolağına daxil olmağa cəhd edən iqlim fəalı Qreta Tunberqi deportasiya edib.

"Qreta Tunberq (Fransa vasitəsilə) İsveçə uçan təyyarə ilə İsraildən yenicə deportasiya edilib", - İsrail Xarici İşlər Nazirliyi (XİN) X platformasındakı paylaşımında bildirib.

Fəalların bəzilərinin də yaxın bir neçə saat ərzində İsrail ərazisini tərk edəcəyi gözlənilir. Deportasiya sənədlərini imzalamaqdan və İsraildən çıxmaqdan imtina edənlər isə, İsrail qanunvericiliyinə əsasən, məhkəmə qarşısına çıxarılacaq və onların deportasiyası ilə bağlı qərarı məhkəmə verəcək.

İsrail XİN-in məlumatına görə, hava limanında sərnişinləri onların mənsub olduqları ölkələrin konsulları qarşılayıb.

9 iyun

İsrail hərbçiləri yaxta ilə Qəzzaya yardım aparan Qreta Tunberqi saxlayıblar

"The Times of Israel" saytı İsrail Xarici İşlər Nazirliyinə (XİN) istinadən məlumat yayıb ki, İsrail hərbçiləri Qəzzaya doğru üzən və göyərtəsində iqlim aktivisti Qreta Tunberq və digər fəalların olduğu "Madleen" yaxtasını saxlayıblar.

"Hərbçilər gəminin göyərtəsinə qalxıblar. "Məşhurların selfi-yaxtası" təhlükəsiz şəkildə İsrail sahillərinə istiqamətlənir. Sərnişinlərin yaxın zamanda öz ölkələrinə geri dönəcəyi gözlənilir", - İsrail XİN bildirib.

Q.Tunberq də daxil olmaqla 12 fəalı daşıyan "Madleen" iyunun əvvəlində Siciliyadan yola düşüb. Gəmi ekipajı Qəzzaya humanitar yardım apardığını bildirib.

"Qəzza zolağına humanitar yardım çatdırmağın "Instagram" selfilərini ehtiva etməyən yolları da var", - İsrail XİN bildirib. Nazirlik fəalların gəmisindən götürülmüş "cüzi miqdarda" humanitar yardımın humanitar kanallar vasitəsilə Qəzzaya göndəriləcəyini vəd edib.

Diplomatlar vurğulayıb ki, Tunberq və onun tərəfdaşları təxribat yaratmağa cəhd ediblər.

"Qreta və digərləri... bir yük maşınından da az humanitar yardım ilə media təxribatı təşkil etməyə çalışdıqları vaxtda son iki həftə ərzində İsraildən Qəzzaya 1200-dən çox yük maşını humanitar yardım çatdırılıb. Bundan əlavə, Qəzza Humanitar Fondu mülki şəxslərə birbaşa olaraq təxminən 11 milyon porsiya yemək paylayıb", - İsrail XİN-in bəyanatında bildirilib.

İsrail hərbçiləri fəallara 7 oktyabr 2023-cü ildə ölkə ərazisinə daxil olan və insanları girov götürən HƏMAS (ABŞ və Aİ tərəfindən terrorçu təşkilat kimi tanınır) döyüşçülərinin üzərindəki kameraların görüntülərini nümayiş etdirməyi planlaşdırır. Bildirilir ki, 43 dəqiqəlik video senzurasız, izlənməsi çətin olan kütləvi qırğın səhnələrini əks etdirir.

Müxalifətdə olan Azərbaycan Xalq Cəbhəsi Partiyası (AXCP) Salyan rayon təşkilatının sədri Zamin Salayevin həbsdə səhhətinin pisləşdiyi bildirilir.

Bu barədə onun partiya dostları məlumat yayıb.

Onların vurğulamasına görə, Z.Salayev səhhətinin ağırlaşmasını özü telefonla bildirib: "Dedi ki, ürəyim tutub, nəfəs ala bilmirəm, boğuluram və həkimlər heç bir tədbir görmür. Hətta iki dəfə vəziyyəti kəskin pisləşib".

Yaxınlarının əlavə etməsinə görə, Z.Salayev əvvəllər də ürək ağrılarından şikayət edib.

Hələlik, bu məlumata Penitensiar Xidmət və başqa rəsmi qurumlardan münasibət almaq mümkün olmayıb.

2023-cü il mayın 22-də Qaradağ rayon Məhkəməsinin hökmü ilə Z.Salayev 4 il azadlıqdan məhrum edilib. Salayev həmin il fevralın 7-də saxlanmışdı və o, Cinayət Məcəlləsinin 221.3-cü (xuliqanlıq – silah və ya silah qisminə əşya tətbiq etməklə) maddəsi ilə ittiham edilirdi. AXCP fəalı ittihamı qəbul etmir.

Xatırlatma

AXCP-nin fəal üzvlərindən Z.Salayev bundan əvvəl - 2020-ci ilin aprelində isə Salyan rayon Məhkəməsində 2 il 3 ay azadlıqdan məhrum edilmişdi. O, həmin vaxt Salyan rayon Polis Şöbəsinin əməkdaşı Həmzə Əzizovun iddiası əsasında Cinayət Məcəlləsinin 147.2 (ağır cinayətdə ittiham etməklə böhtan atma) və 148-ci (təhqir) maddələri ilə məhkum edilib. Salayev həbsindən bir müddət əvvəl sosial şəbəkələrdə adıçəkilən polis əməkdaşı ilə mübahisəsinin videosunu yaymışdı. Həmin videoda Salayev Əzizovu rayonda yaşayan bir qadına qarşı təcavüzə görə ittiham edirdi. Video yayılandan sonra polis əməkdaşı Salyan rayon Məhkəməsində ona qarşı xüsusi ittiham qaydasında iddia qaldıraraq həbsini tələb etmişdi. Videoda haqqında bəhs olunan xanım isə Əzizova bıçaqla xəsarət yetirdiyinə görə 7 il azadlıqdan məhrum edilib. O, polisin zorakı hərəkətlərindən müdafiə olunmaq üçün ona xəsarət yetirdiyini bildirib. Polis əməkdaşı isə onun dediklərinin həqiqətəuyğun olmadığını söyləyib. Salayev 2022-ci il yanvarın 19-da - Amnistiya Aktı ilə əlaqədar vaxtından bir neçə ay əvvəl azadlığa çıxmışdı.

Azərbaycan Xarici İşlər Nazirliyi (XİN) iyunun 9-da Rusiya prezidentinin köməkçisi Vladimir Medinskinin "Russia Today" kanalına müsahibəsi zamanı Ermənistan-Azərbaycan münaqişəsi ilə bağlı səsləndirdiyi fikirlərə cavab verib.

XİN vurğulayıb ki, Rusiya Federasiyası prezidentinin köməkçisinin "keçmiş Ermənistan-Azərbaycan münaqişəsi ilə bağlı faktların təhrif olunduğu, Qarabağ bölgəsini mübahisəli ərazi kimi təqdim edən" açıqlaması təəssüf və təəccüb doğurur.

XİN-ə görə, təəssüf ki, V.Medinski Rusiya-Ukrayna müharibəsini Qarabağda mövcud olmuş vəziyyətlə müqayisə edir. "Azərbaycan heç zaman heç bir ölkənin ərazi bütövlüyünü pozmadığına və heç bir ölkəyə qarşı aqressiv müharibə aparmadığına görə belə müqayisə yersizdir. Azərbaycan 2020-ci və 2023-cü illərdə öz suveren və beynəlxalq birlik tərəfindən tanınmış ərazilərində Vətən müharibəsi və antiterror tədbirləri həyata keçirib", - açıqlamada əlavə edilib.

Azərbaycan XİN-in bəyanatına səbəb olan müsahibəsində prezident Vladimir Putinin köməkçisi Medinskinin deyib ki, əgər Rusiya-Ukrayna münaqişəsi cəbhə xətti boyunca dayandırılarsa və sülh barədə razılığa gəlinməsə, "o zaman – bilirsiniz, Ermənistanla Azərbaycan arasında mübahisəli bölgə, Qarabağ var idi – bu bölgə nəhəng Qarabağa çevriləcək".

"Bir müddət sonra Ukrayna NATO ilə birlikdə, müttəfiqləri ilə (NATO-ya daxil olacaq) onu geri almağa çalışacaq və bu, planetin sonu, nüvə müharibəsi olacaq", - Medinski iddia edib.

Xatırlatma

Ötən əsrin 80-ci illərində kəskinləşən Qarabağ münaqişəsi üzündən Azərbaycan və Ermənistan arasında silahlı toqquşmalar baş verib. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatla Azərbaycan bütün ərazisində suverenliyini bərpa edib. Ondan sonra bölgədən erməni əhali köç edib. Yerevan bunu "etnik təmizlənmə" kimi dəyərləndirib, amma rəsmi Bakı bunu qəbul etməyib. Son illər iki ölkə arasında müxtəlif formatlarda sülh danışıqları aparılsa da, hələlik, sülh sazişi imzalanmayıb.

Dövlət Sərhəd Xidmətinin (DSX) müddətli hərbi qulluqçusu, əsgər Rasim Həsənlinin ölümü ilə bağlı cinayət işi açılıb.

Bu barədə yerli saytlara Hərbi Prokurorluğunun Mətbuat xidmətindən məlumat verilib.

Bildirilib ki, faktla bağlı Bakı Hərbi Prokurorluğunda Cinayət Məcəlləsinin 342.1-1-ci (Rəisin və ya vəzifəli şəxsin öz xidməti borcuna vicdansız və ya laqeyd münasibəti nəticəsində öz xidməti vəzifəsini yerinə yetirməməsi və ya lazımi qaydada yerinə yetirməməsi - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanılaraq ibtidai istintaq aparılır.

"Hazırda ibtidai istintaq davam etdirilir, qanunvericiliyin tələblərinə uyğun olaraq bütün tədbirlərin görülməsi, o cümlədən hər bir əmələ və fakta hüquqi qiymət verilməsi təmin ediləcək", - qurumdan əlavə olunub.

Həmin maddə ilə 2 ildən 5 ilədək müddətə azadlıqdan məhrum etmə cəzası nəzərdə tutulur.

DSX bir gün əvvəl, iyunun 8-də bildirmişdi ki, hərbi qulluqçu R.Həsənli xəstəliyi ilə əlaqədar müalicə olunduğu tibb müəssisəsində vəfat edib. Amma qurum gənc əsgərin xəstəliyinin nə olduğunu açıqlamırdı.

Məsələyə, hələlik, əsgərin yaxınlarından da münasibət almaq mümkün olmayıb.

Xəzər Hərbi Tədqiqatlar İnstitutunun (XHTİ) məlumatına görə, 2025-ci ilin təkcə ilk rübündə Azərbaycanda azı 14 hərbi qulluqçu qeyri-döyüş şəraitində həyatını itirib. Amma bu rəqəmi, hələlik, rəsmi qurumlar ayrılıqda təsdiqləməyiblər.

Bu gün, iyulun 9-da Naxçıvan Muxtar Respublikasının Naxçıvan şəhərində 17 nəfərin qidadan zəhərləndiyi bildirilir.

AZƏRTAC-ın xəbərinə görə, muxtar respublikada Yoluxucu Xəstəliklər Mərkəzinin Təcili Tibbi Yardım Şöbəsinə 17 şəxs qida zəhərlənməsi diaqnozu ilə daxil olub.

Mərkəzin həkim-infeksionisti Nəzmin Allahverdiyeva deməsinə görə, xəstələrin vəziyyəti orta ağır, iki xəstənin vəziyyəti isə ağır qiymətləndirilib. Doqquz xəstə azyaşlı olub.

O əlavə edib ki, aparılan simptomatik yardımlar və dinamik müşahidə sonrası xəstələr tam klinik sağalma ilə evə buraxılıblar.

Qida Təhlükəsizliyi Agentliyindən isə bildirilib ki, təxirəsalınmaz tədbirlər həyata keçirilib, məhsullarından şübhə edilən bir dönərxananın fəaliyyəti dayandırılıb.

Qurumdan vurğulanıb ki, hadisə mövsümlə də əlaqədar ola bilər, məhsulların saxlanması, istifadə qaydalarının pozulması ilə də: "Hazırda bu istiqamətdə araşdırma davam etdirilir, ət, sous, ketçup və mayonezlərdən nümunələr seçilərək Qida Təhlükəsizliyi İnstitutunun laboratoriyasına təqdim olunub".

Məsələyə fəaliyyəti dayandırılan dönərxananın sahibindən münasibət almaq mümkün olmayıb.

Son vaxtlar Azərbaycanda belə oxşar hadisələr vaxtaşırı baş verməkdədir.

Amma ölkədə qida zəhərlənməsi ilə bağlı mərkəzləşmiş qaydada detallı rəsmi statistika açıqlanmır. Ekspertlər qida zəhərlənməsini, əsasən, əhalinin maddi durumu və keyfiyyətsiz ərzağın süfrələrə yol tapması ilə izah edirlər.

Azərbaycan Xalq Cəbhəsi Partiyası (AXCP) Qaradağ şöbəsinin üzvü Rahil Quliyevin iyunun 7-də saxlandığı bildirilir.

Bu barədə AXCP-dən iyunun 8-də məlumat yayılıb.

Partiyadan vurğulandığına görə, onun haqqında cinayət işi açılıb. Amma partiyadan detallar açıqlanmayıb.

AXCP-nin açıqlamasına, hələlik, rəsmi qurumlardan münasibət almaq mümkün olmayıb.

R.Quliyev ötən ayın əvvəlində 30 sutka inzibati qaydada həbs edilmişdi. O, bir neçə gün idi ki, azadlığa çıxmışdı.

R.Quliyev AXCP sədri Əli Kərimlinin mühafizəçisi Elnur Quliyevin qardaşıdır. E.Quliyev özü də qardaşından öncə inzibati qaydada həbs edilmişdi.

Ə.Kərimli bu yaxınlarda bildirmişdi ki, son aylar ona ictimai əsaslarla mühafizəçilik edən və onu avtomobili ilə tədbirlərə aparan səkkiz partiya fəalı müxtəlif ittihamla həbs olunub.

Xatırlatma

Müxalifətdə olan AXCP-nin hazırda 15 civarında üzvü uzunmüddətli həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Üstəlik, AXCP fəallarından bəziləri inzibati qaydada da həbs edilir. Onlar isə, əsasən, polisə müqavimət və xırda xuliqanlıqda ittiham edilirlər.

Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 360-dan çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.